Orjinal Dildeki MetinMSKİBUMskibu na kidupta, illa ğali tasinon. Ğaliş kinais kidaginon. Ğalis kinais okidu kai varenna, xendekiten muqonopan kai yeişa do ek kidupan mskibu. 3kai xendekişen mulun do mançxaşa nulun. Mançxaşen nulun ğurnişa. Ğurnis uğun spina. 3kai na omçipanaps do geçaps çakis. Spina ikipan ncaşen. Gamaxutonupan burgiten do arkele 3kai namulun yeikele, m3ika mopartanei uğun do ena gamulun yeikele mçipe uğun. Xonistei ren. Çakis msvaepe en çanei, spinaşen nagamaxtas 3kai naten msvas do oburbalaps, oktaps çaki. Çaki gedgin çeliğis. Çeliğiş jin ikten. Çeliği, gürcice ptvkatna u3umelan poladis. Ordo varişien kapeti ren. Çakiş ncas guşuzin lapia. Lapias tis moçans akvi. Akvis gedgin jini kva do oktaps. Akvi jur tulli en. Ar yen ki, jur köşe uğun, arçkva yen ki, otxo köşe uğun. Sum na uğun var en, man varmiziun. Rahmetli papulik naçkaduptu akvepe miçkin. Jur köşeli do otxo köşeli. Akvi kapeti tasinonki, kva oktas. kvak var ocginas. Amuşeni ya çeliğişi ikipan ya kapeti demiişi. Tudeni kva duşemes kapetişa okaçun ki, varinkanasinon. Kvas uğun xutula Amus u3umelan gui. Lapiaşi mçxanapa guişi oxagüa xoş var iqven. Gui dido iqven. Amuşeni kvaş guis m3kilepe guçanapan kapetişiki lauzti vargamalas do tude ğalişa vardilibğas. M3kili lapiak naşias do dimbolanas, tekrakati goşoçanapan. Ar koçik mskibus lauzti kogüdu, kogö3ipxu. Ekule kvaş kenais kelaxedu do kodinciru do mjoras itibins. Megerem kvaş gui gamalapei teen do lauzti ğalis dilibğen do ğalik nimes. Mitxanik, koçi tui, oxorca tui, u3umers ki: -Mu ikip ya sin ya? Lauzti guişen dilibğen do sin ak mot elaxe? Şkule; -Man çkimi borci dopi, kogeudvi do a3i mskibuş boci ren ki, mkvas ya? Kvaş jin, darabakele, modini ren. Modiniti xonistei ren, hama margvali var en, otxo köşeli ren. Emuşi okaçxeni semti darabas okaçun. 3oxleni semti darabaşen darabaşa gondvei ncas noçkadun. Modinis imtren jur puti, sum puti, xut puti, vit puti. Mskibuş Oğagüa en. Çita mskibus 3ita modini aqven, didis didi. Modinis e3akieli en kayiki. Kayiki mançxaşi mengapua en hama geide motvalei en. Lazuti na var dibğasşeni. Modinişen lazuti kayikis dilibğen, kaikişen kvas guis dilibğen. Mem3qvei jur-sum tane. Kayikişi 3oxleni semtis jur ucisti toki en gedvalei do tokişi orta yeis majua toki en gedvalei. Aya tokişi majua uci jin na gonzin ncas (Modini na okaçaps ncas) jur kafi meçkadei en do ek gokiapan do ucis monka kva go3okidapan ki varnaskuas. Aya toki me3İpxuşeni ren. Mçxu mkii ginonna kayiki gönçap do lauzti dido dilibğen. Mçipe ginonna yonçap do çita dilibğen, mçipe mkii mkups. Kayikis eşatuxnei uğun do ek dolozin bigaş ar uci. Majua uci duşumeşi darabaşi eşaçkielis dolozin. Aya bigas dolokidei en orakaloni. Orakalonişi majua uci jini kvas gezin. Kva na ikten, orakaloni o3xontinaps. Orakalonikti kayiki onkanaps edo modinişen na moxtas kayikişa lauzti kvaş guis dilibğen do imkven. Kvaşi 3oxleni semtis tude xaro en, mkii na dilibğen yei. Kvak na mkii dobğas, gokosupan okosaleten do ar yeis okopğapan xaos. Xaoşen lapiaten kalatis iqveni, çuvalis iqveni dolobğapan. Kalati şupan mtke3iten, kalati şupan msiciten. Msiciten na şvan kalatis u3umelan omkiale. Edo ntkabei şupan ki, mkii vardibğen. Çualis tis goudgipt kerkeli do mkii raxati dolovobğapt. Mkii jur tulli en. Guişi mkii u3umelan do galeni mkii u3umelan. Guişi mkii mçipe en, çorçi en do kvaş yanis melaps. Kvak mendra varuçumes. Momçxua mkii kvaşen mendra dibğen. Masuma, ker3ela. Lauztis xoş ker3ele uğun. İa daa mendra dibğen. Sum kati dobğaps guiş mkii, orta mkii do ker3ela. Lazutişi mçipepe mkii kvaş ixik yomğiaps (kva xoş ikten, muço ixi uğun) do kidapes, darabapes nakiden. Emus u3umelan kidaş mkii. A3i ginonna mçxu omkvapi, ginonna mçipe omkvapi. Amuşeni kvaş duşumeşi yandan mskibus uğun yedazale. Yedazaleşi tudeni uci çaki na gedgin ncaşi ucis meçkadei en. Yedazaleşi jini ucis salistei tako mişuzin do tako nonçaşi, kva yinçen, gamonçaşi ginçen. Mçxu mkii gintaşi meşonçap, mçipe gintaşkule gamonçap. Burğuli gintaşi daa yonçap. Yedazale xvala mçipe do mçxu mkiişeni va en. Kartonis xomula (Gamaxominei) lauzti variqven. Bazi kere şu lauzti yenna guis gvakien do kva kai vaoiktaps, varamkven. Am vaktis yedazale e3ozdipan, yudazupan. Kva zoi ikten do guis na gokirs ia kagamaxi3kups. Kvas gui gamuxi3kupan. (Muço kagamaxiskuya, eti zoponan. ) Mskibu dido vakitis na iktas kva dişiaşi, am oras jini kva do3kipan do juisti (Jur kvasti) Taryaği (Taraği) meçapan, zangupan, kibii uxonupan. Taryaği çeliğişi ikipan. Ar uci m3ikili iqven, majua uci parto. Juiti mçkiups. Kvaşi guikala m3kiliten zangupan, Kavşi kenaepes partoten zangupan. Mançxas uğun O3xoci. Bu3xiti u3umelan, o3xociti u3umelan. O3xocistei aşo svaeli en bigape yada demiepe. Ğalik namuğas butka, noxapule spinas vananzgipasşeni uxonupan bu3xi, o3xoci ğurnisti uxonupan. Yen mskibu ki, ar o3xoci uğun xvala mançxas. O3xoci jur nauxona emuşeni kai enna teği o3xocişen imtuna majua o3xocik çopas. Butka iqveni, noxapule iqveni, biga iqveni, mutxani namulas ğalik. O3xocikala mançxaşi ekole-akole noçkadapen jur kitiş mapecani (Partana) biga. Amus u3umelan golakvatoni. Mskibu dodginu gintaşkule golankvatonis goşoçanap lapia do 3kai çkva ğurnişa varulun. Yandan diben. Omkuşi na diçodas, kva boşi variktasyaşi, ğurnis spinakala uxonupan gekvatale. Kapeti pi3aişi do uci meçkidei en çakiş yandan do3igei ncas. Ar kafiten yen meçkadeiki, iktas. Majua uci spinakala jur do3igei ncas ortas goşazin. Pi3aişi aya ucis mekieli en teli. Aya telişi majua uci mekieli en modinişi mengapua çita otxo köşeli xonis. Aya xoni duludgipan modinis. Modinis lauzti naiçodas, em vaxtis ia çita xoni keşastun. Emuşeniki gekvatele monka en do monkanoba muşik gelo3inaps doskdinei lauzti, kaginçen spinakala 3kai kagulukvateps. Mskibu kododgitun. Boşi vaikten do kva vatuxun. Yazan: Avantandil Abulaze-Sarpi-1984 Lazcaya çeviren: Yılmaz Avcı-Hopa-2005 |